بلوچستان کے 10 نوجوانوں کو ہر سال دنیا کی ممتاز جامعات میں پی ایچ ڈی اسکالرشپس دینے کا اعلان

حکومتِ بلوچستان نے بلوچستان ایجوکیشن اینڈومنٹ فنڈ (BEEF) کے تحت دنیا کی 100 سے زائد ممتاز عالمی جامعات میں پی ایچ ڈی (PhD) اسکالرشپ پروگرام کا اعلان کرتے ہوئے امیدواروں سے درخواستیں طلب کر لی ہیں۔ باضابطہ اعلامیے کے مطابق اس پروگرام کے تحت صوبہ بلوچستان سے ہر سال 10 باصلاحیت اور مستحق امیدواروں کو اعلیٰ تعلیم و تحقیق کے لیے بیرونِ ملک بھیجا جائے گا۔

وزیراعلیٰ بلوچستان سرفراز بگٹی نے اس عالمی اسکالرشپ پروگرام کے باضابطہ اجرا پر خوشی کا اظہار کرتے ہوئے اسے بلوچستان کے روشن اور جدید مستقبل کی نوید قرار دیا ہے۔ انہوں نے کہا کہ نوجوانوں کو دنیا کی بہترین یونیورسٹیوں تک پہنچانے کا سفر شروع ہو چکا ہے، اور بلوچستان کا مستقبل بندوق اٹھانے والوں کے بجائے کتاب تھام کر عالمی سطح پر علم و تحقیق کا لوہا منوانے والے نوجوان ہیں۔ انہوں نے مزید کہا کہ حکومت دہشت گردی و انتہا پسندی کا مقابلہ تعلیم، شعور اور نوجوانوں کو مساوی ترقیاتی مواقع فراہم کر کے کر رہی ہے، جس سے صوبے میں امید اور علم کے نئے دروازے کھلیں گے۔