تیزاب گردی کا شکار لیڈی ڈاکٹر کو بچانے والے وارڈ بوائے کیلئے سول ایوارڈ کا اعلان

وزیراعلیٰ بلوچستان سرفراز بگٹی نے کوئٹہ میں تیزاب گردی کے واقعے کے دوران لیڈی ڈاکٹر ماہ نور کی جان بچانے والے وارڈ بوائے عبدالرزاق کیلئے سول ایوارڈ دینے کا اعلان کیا ہے۔

وزیراعلیٰ کے مطابق عبدالرزاق ترکئی نے انتہائی خطرناک صورتحال میں فوری طور پر جان کی پرواہ کیے بغیر متاثرہ ڈاکٹر کی مدد کی، جو بہادری اور فرض شناسی کی اعلیٰ مثال ہے۔

انہوں نے کہا کہ ایسے افراد قوم کا فخر ہوتے ہیں اور عبدالرزاق کی جرات کو قومی سطح پر سراہا جائے گا۔ ان کا بروقت اقدام انسان دوستی اور پیشہ ورانہ ذمہ داری کی روشن مثال ہے۔

وزیراعلیٰ بلوچستان نے مزید کہا کہ حکومت انسانی خدمت کے جذبے کو فروغ دینے اور شہریوں کے جان و مال کے تحفظ کے لیے ایسے اقدامات کرنے والوں کی حوصلہ افزائی جاری رکھے گی۔