فیلڈ مارشل سے بحرینی وزیر خارجہ کی ملاقات، دوطرفہ دفاعی تعاون پر تبادلہ خیال

بحرین کے وزیرِ خارجہ ڈاکٹر عبداللطیف بن راشد الزیانی نے جنرل ہیڈ کوارٹرز (جی ایچ کیو) راولپنڈی میں آرمی چیف سے اہم ملاقات کی۔ پاک فوج کے شعبہ تعلقاتِ عامہ (آئی ایس پی آر) کے مطابق، ملاقات کے دوران باہمی دلچسپی کے امور، خطے کی مجموعی سیکیورٹی صورتحال اور پاکستان و بحرین کے درمیان دوطرفہ دفاعی و عسکری تعاون کو مزید وسعت دینے پر تفصیلی تبادلہ خیال کیا گیا۔

آرمی چیف نے دونوں برادر ممالک کے دیرینہ تعلقات کو مشترکہ اقدار اور باہمی احترام کا عکاس قرار دیتے ہوئے دفاعی شعبے میں شراکت داری کو مزید مضبوط بنانے کے عزم کا اعادہ کیا۔ اس موقع پر بحرینی وزیرِ خارجہ نے پاکستان کی مسلح افواج کی اعلیٰ پیشہ ورانہ صلاحیتوں اور آپریشنل تیاریوں کی تعریف کی، جبکہ خطے میں امن و استحکام کے لیے پاکستان کے کلیدی کردار اور کاوشوں کا اعتراف کیا۔