گورنر راج یا ایمرجنسی، فیصلہ صدر اور وزیراعظم کا ہوگا: اعظم نذیر تارڑ

وفاقی وزیرِ قانون و انصاف اعظم نذیر تارڑ نے میڈیا سے گفتگو کرتے ہوئے واضح کیا ہے کہ پاکستان پیپلز پارٹی (پی پی پی) کے ساتھ حکومت کی حالیہ ملاقات کا خیبرپختونخوا میں گورنر راج یا ایمرجنسی کے نفاذ سے کوئی تعلق نہیں تھا۔ انہوں نے کہا کہ پیپلز پارٹی حکومت کی اہم ترین حلیف جماعت ہے اور کسی بھی پارلیمانی و قانون سازی کے سیشن سے پہلے اتحادیوں کو معمول کے مطابق اعتماد میں لیا جاتا ہے۔

وزیرِ قانون نے گورنر راج اور ایمرجنسی کے آئینی آپشنز پر بات کرتے ہوئے کہا کہ ان کا اس معاملے پر وہی موقف ہے جو پہلے تھا، اگر آئینی اور قانونی تقاضے پورے ہوں تو یہ مکمل طور پر ایک قانونی طریقہ کار ہے۔ انہوں نے زور دے کر کہا کہ اس طرح کا حتمی فیصلہ آئین کے تحت صرف صدرِ مملکت اور وزیراعظم کا اختیار ہے۔ عمران خان اور دیگر سیاسی رہنماؤں کی رہائی کے معاملے پر بات کرتے ہوئے اعظم نذیر تارڑ کا کہنا تھا کہ فیصلہ عدالتوں نے کرنا ہے اور عدلیہ کا جو بھی فیصلہ آئے گا اسے من و عن تسلیم کیا جائے گا۔ خیبرپختونخوا کی امن و امان کی صورتحال پر تشویش کا اظہار کرتے ہوئے انہوں نے کہا کہ نامناسب مطالبوں پر نظرثانی ہونی چاہیے اور پی ٹی آئی قیادت کو بھی اپنا رویہ نپا تلا رکھنا چاہیے۔