عوام ایکسپریس حادثے سے بال بال بچ گئی، آخری بوگی پٹری سے اتر گئی

کراچی سے پشاور جانے والی مسافر ٹرین ‘عوام ایکسپریس’ گجرات کے علاقے رکھ پبی کے قریب ایک بڑے حادثے سے بال بال بچ گئی، جہاں سفر کے دوران ٹرین کی آخری بوگی اچانک پٹری سے نیچے اتر گئی۔ ریلوے ذرائع کے مطابق، یہ واقعہ رکھ پبی کے مقام پر پیش آیا۔ بوگی پٹری سے اترتے ہی ٹرین ڈرائیور نے کمالِ مہارت اور بروقت حکمت عملی اختیار کرتے ہوئے ٹرین کی رفتار کو قابو میں کیا، جس کے باعث ایک خوفناک حادثہ ہونے سے ٹل گیا اور خوش قسمتی سے ٹرین میں سوار تمام مسافر مکمل طور پر محفوظ رہے۔ واقعے کی اطلاع ملتے ہی ریلوے حکام اور تکنیکی عملہ فوری طور پر موقع پر پہنچ گیا اور صورتحال کا تفصیلی جائزہ لیا۔ ابتدائی معائنے کے بعد ٹرین کو مسافروں کے ساتھ پشاور کی جانب روانہ کر دیا گیا، جبکہ پٹری سے اترنے والی آخری بوگی کو ضروری مرمت کے بعد روانہ کیا جائے گا۔ ریلوے انتظامیہ کی جانب سے واقعے کا سخت نوٹس لیتے ہوئے حادثے کی اصل وجوہات کا تعین کرنے کے لیے باقاعدہ تحقیقات کا آغاز کر دیا گیا ہے۔