دنیا کی پہلی ’نیوکلیئر گھڑی‘ تیار، حیرت انگیز ایجاد

آسٹریا اور چین کے سائنسدانوں نے وقت کی پیمائش اور جدید ٹیکنالوجی کی تاریخ میں ایک اہم ترین سنگِ میل عبور کرتے ہوئے دنیا کی پہلی دو فعال ’نیوکلیئر گھڑیاں‘ (Nuclear Clocks) کامیابی سے تیار کر لی ہیں، جو کائنات کے اسرار جاننے اور وقت کی پیمائش کے نئے دروازے کھول سکتی ہیں۔

معروف سائنسی جریدے ‘نیچر’ میں شائع ہونے والی دو الگ الگ رپورٹس کے مطابق، ویانا یونیورسٹی آف ٹیکنالوجی اور چین کی شنگھوا یونیورسٹی کے محققین نے ایک دوسرے سے آزادانہ طور پر کام کرتے ہوئے یہ شاندار کامیابی حاصل کی۔ سائنسدانوں کے مطابق اس گھڑی کا تعلق جوہری توانائی سے نہیں ہے، بلکہ اسے ‘نیوکلیئر’ اس لیے کہا جاتا ہے کیونکہ اس میں وقت کی پیمائش کے لیے ایٹم کے بیرونی الیکٹرانز کے بجائے اس کے مرکزے (Nucleus) کی توانائی کی سطحوں میں ہونے والی تبدیلیوں کا استعمال کیا جاتا ہے۔ اس مقصد کے لیے دونوں ٹیموں نے تھوریم 229 (Thorium-229) کی نایاب قسم کو کیلشیم فلورائیڈ کے ٹھوس کرسٹل میں قید کرکے استعمال کیا۔

ویانا ٹیم کے سربراہ پروفیسر تھورسٹن شم اور چینی ٹیم کے سربراہ شی چیان ڈنگ کا کہنا ہے کہ نیوکلیئر گھڑیاں روایتی ایٹمی گھڑیوں کے مقابلے میں بیرونی برقی مقناطیسی اثرات اور درجہ حرارت کی تبدیلیوں سے کم متاثر ہوتی ہیں، جس سے یہ مستقبل میں انتہائی مستحکم اور غیر معمولی حد تک درست ثابت ہوں گی۔ ماہرین کا ماننا ہے کہ جی پی ایس، انٹرنیٹ اور مالیاتی نظام کے لیے انتہائی اہمیت کی حامل ان گھڑیوں کی مدد سے نہ صرف وقت کی پیمائش کو مزید دقیق بنایا جا سکے گا، بلکہ یہ بنیادی طبیعیات کے تجربات اور کائنات کے پراسرار جزو ‘ڈارک میٹر’ (Dark Matter) کا سراغ لگانے میں بھی مددگار ثابت ہوں گی