لاہور:وفاقی وزیرعطاء اللہ تارڑ کی گاڑی کے قریب ہوائی فائرنگ، ملزم اسلحہ سمیت گرفتار

وفاقی وزیر اطلاعات و نشریات عطا اللہ تارڑ کی گاڑی کے قریب ہوائی فائرنگ کا واقعہ پیش آیا ہے، جس پر لاہور پولیس نے فوری کارروائی کرتے ہوئے ملزم اسامہ کو اسلحہ اور گاڑی سمیت گرفتار کر لیا ہے۔ یہ واقعہ گزشتہ رات لاہور کے علاقے ڈیفنس اے میں اس وقت پیش آیا جب وفاقی وزیر اپنے اہل خانہ کے ساتھ جا رہے تھے۔ عطا اللہ تارڑ کے مطابق، ایک گاڑی نے انہیں اوور ٹیک کیا اور کار سے باہر پستول نکال کر ہوائی فائرنگ کی، جس پر ان کے اسٹاف نے گاڑی کا پیچھا کر کے نمبر نوٹ کیا اور پولیس کو اطلاع دی۔ وفاقی وزیر نے واضح کیا کہ وہ اس واقعے میں محفوظ رہے اور یہ کوئی ٹارگٹڈ حملہ نہیں تھا، بلکہ ملزم نوجوان کو یہ معلوم ہی نہیں تھا کہ کار میں کون موجود ہے۔ لاہور پولیس نے ملزم کی گرفتاری کے لیے سیف سٹی کیمروں اور جدید ٹیکنالوجی کا استعمال کیا اور ملزم کے خلاف مقدمہ درج کر کے مختلف پہلوؤں پر مزید تحقیقات کا آغاز کر دیا ہے۔