عمران خان کے معائنے میں سپریم کورٹ کے حکم کی تمام ریکوائرمنٹس مکمل کیں: عطا تارڑ

وفاقی وزیرِ اطلاعات و نشریات عطا تارڑ نے کہا ہے کہ بانی پی ٹی آئی عمران خان کے طبی معائنے کے سلسلے میں سپریم کورٹ کے جاری کردہ احکامات اور قانونی ریکوائرمنٹس کو مکمل طور پر شفاف انداز میں پورا کیا گیا ہے۔ اسلام آباد میں میڈیا سے گفتگو کرتے ہوئے ان کا کہنا تھا کہ معائنے کے وقت بانی پی ٹی آئی کی ہمشیرہ اور شفا انٹرنیشنل ہسپتال کے ڈاکٹرز موقع پر موجود تھے، جبکہ انتظامیہ نے سیکیورٹی سمیت تمام ضروری انتظامات یقینی بنائے۔

وزیرِ اطلاعات نے اس بات پر زور دیا کہ صحت کے معاملے پر سیاست نہیں ہونی چاہیے اور حکومت کا موقف ہے کہ قانون کی نظر میں تمام قیدیوں کے ساتھ یکساں سلوک ہونا چاہیے اور کسی کو خصوصی رعایت یا استثنیٰ نہیں ملنا چاہیے۔ انہوں نے واضح کیا کہ حکومت آئین و قانون کی روشنی میں ہی تمام امور کو آگے بڑھائے گی اور اس کیس میں بھی عدالتِ عظمیٰ کے فیصلے پر من و عن عملدرآمد کیا گیا ہے۔