مخالفین کو آزاد کشمیر میں ہماری کامیابی ہضم نہیں ہو رہی: عطا تارڑ

وفاقی وزیرِ اطلاعات ونشریات عطا تارڑ نے کہا ہے کہ آزاد کشمیر قانون ساز اسمبلی کے انتخابات کے دوسرے مرحلے میں مسلم لیگ (ن) نے واضح برتری حاصل کرتے ہوئے سادہ اکثریت حاصل کر لی ہے، جبکہ مخالفین سے ہماری کامیابی ہضم نہیں ہو رہی۔ اسلام آباد میں میڈیا سے گفتگو کرتے ہوئے انہوں نے کہا کہ کشمیر کے عوام نے تعمیر و ترقی اور کارکردگی کے ٹریک ریکارڈ کی بنیاد پر مسلم لیگ (ن) پر اعتماد کا اظہار کیا ہے۔ انہوں نے صوبائی وزیرِ اطلاعات سندھ شرجیل انعام میمن کی جانب سے لگائے گئے دھاندلی کے الزامات کو بے بنیاد قرار دیتے ہوئے کہا کہ بلاجواز الزامات لگانے والے شواہد پیش کریں۔ عطا تارڑ نے یاد دہانی کرائی کہ جس طرح مسلم لیگ (ن) نے گلگت بلتستان میں پیپلز پارٹی کی فتح پر مبارکباد دی تھی، اسی طرح انہیں بھی کھلے دل کا مظاہرہ کرتے ہوئے آزاد کشمیر کے نتائج کو قبول کرنا چاہیے۔