بانی پی ٹی آئی کو ڈیل دی جا رہی ہے نہ ڈھیل، تمام باتیں قیاس آرائیاں ہیں: عطا تارڑ

لندن: وفاقی وزیر اطلاعات عطا تارڑ نے کہا ہے کہ بانی پی ٹی آئی کو نہ کوئی ڈیل دی جا رہی ہے اور نہ ہی ڈھیل، اس حوالے سے تمام باتیں محض قیاس آرائیاں ہیں۔

لندن میں میڈیا سے گفتگو کرتے ہوئے عطا تارڑ نے کہا کہ بانی کی صحت کی صورتحال تشویشناک نہیں ہے اور سوشل میڈیا پر اس حوالے سے بلاوجہ سنسنی پھیلائی گئی۔ انہوں نے کہا کہ بانی پی ٹی آئی کی صحت اب بہت بہتر ہے اور جو مسئلہ تھا وہ حل ہو چکا ہے۔

وفاقی وزیر اطلاعات کا کہنا تھا کہ پی ٹی آئی رہنماؤں کو بانی کی صحت کے حوالے سے باضابطہ بریفنگ دی گئی ہے اور صحت کے معاملات پر سیاست نہیں ہونی چاہیے۔ انہوں نے کہا کہ ماضی میں یہ دعوے کیے جاتے تھے کہ سہولیات ختم کر دی جائیں گی، تاہم موجودہ صورتحال میں طبی ماہرین نے بانی پی ٹی آئی کا معائنہ کیا اور پارٹی قیادت کو بھی آگاہ کیا گیا۔

عطا تارڑ نے زور دیا کہ صحت جیسے سنجیدہ معاملے کو سیاسی رنگ دینا مناسب نہیں۔