سائنسدانوں نے مرتے ستارے کی راکھ سے بنا نیا سیارہ دریافت کرلیا

ماہرینِ فلکیات نے ایک ایسے منفرد سیارے کی نشاندہی کی ہے جو ممکنہ طور پر ایک دم توڑتے ہوئے ستارے سے خارج ہونے والے مادے سے تشکیل پایا ہے۔ یونیورسٹی آف واروک کے محققین کی سربراہی میں ہونے والی اس تحقیق کے مطابق، یہ اپنی نوعیت کا پہلا ممکنہ “دوسری نسل کا سیارہ” ہے جو ایک وائٹ ڈوارف (مردہ ستارے) کے گرد گردش کر رہا ہے۔ سائنسدانوں کا کہنا ہے کہ دوسری نسل کے یہ سیارے ان مادّوں سے بنتے ہیں جو کسی ستارے کی زندگی کے آخری مرحلے میں خلا میں بکھر جاتے ہیں، اور وائٹ ڈوارف کے گرد اس نوعیت کے سیارے کی موجودگی انتہائی نایاب اور غیر متوقع ہے۔ اگر مزید مشاہدات سے اس دریافت کی حتمی تصدیق ہو جاتی ہے، تو اس سے کائنات میں سیاروں کی تخلیق اور ان کی تعداد کے بارے میں موجود فلکیاتی نظریات پر نظرِ ثانی کرنا پڑے گی۔