آسام میں مسافر ٹرین ہاتھیوں کے غول سے ٹکرا گئی، 7 ہاتھی ہلاک، بوگیاں پٹری سے اتر گئیں

بھارت کی شمال مشرقی ریاست آسام میں ایک مسافر ٹرین ہاتھیوں کے غول سے ٹکرا گئی، جس کے نتیجے میں 7 ہاتھی ہلاک جبکہ ایک زخمی ہوگیا۔

مقامی حکام کے مطابق حادثہ گزشتہ رات پیش آیا، جب ٹرین ہاتھیوں کے غول سے ٹکرا کر پانچ بوگیوں سمیت پٹری سے اتر گئی۔ خوش قسمتی سے واقعے میں کسی مسافر کے زخمی ہونے کی اطلاع نہیں ملی۔

پولیس کا کہنا ہے کہ ٹرین ڈرائیور نے ہاتھیوں کو دیکھتے ہی ایمرجنسی بریک لگائی، تاہم ٹرین بروقت نہ رک سکی۔ متاثرہ ٹرین بھارتی ریاست میزورام سے نئی دہلی جا رہی تھی۔

غیر ملکی خبر ایجنسی کے مطابق، آسام بھارت میں موجود تقریباً 22 ہزار جنگلی ہاتھیوں میں سے 4 ہزار سے زائد کا مسکن ہے۔ حکام کے مطابق ہاتھیوں کی محفوظ نقل و حرکت کے لیے مخصوص راہداریوں میں ٹرینوں کی رفتار پر پابندیاں عائد کی گئی ہیں، تاہم یہ حادثہ ان مقررہ راہداریوں سے باہر پیش آیا۔