بھارتی قبضے سے کشمیر کی آزادی تک جنوبی ایشیا محفوظ نہیں ہو سکتا: صدر زرداری

پارلیمنٹ کے مشترکہ اجلاس سے خطاب کرتے ہوئے صدرِ مملکت آصف علی زرداری نے کہا ہے کہ بھارتی قبضہ سے کشمیر کی آزادی تک جنوبی ایشیا میں امن قائم نہیں ہو سکتا۔ اجلاس کی صدارت اسپیکر ایاز صادق کر رہے ہیں جبکہ وزیراعظم شہباز شریف، صوبوں کے وزرائے اعلیٰ، گورنر اور غیر ملکی سفارتکار بھی اس میں شریک ہیں۔ اجلاس کا آغاز قومی ترانے سے ہوا، جس کے بعد تلاوتِ کلام پاک کی گئی۔

صدر زرداری نے کہا کہ بطور دو بار منتخب صدر یہ ان کا پارلیمنٹ کو 9واں خطاب ہے، اور نئے پارلیمانی سال کے آغاز پر قوم کو عزم مضبوط رکھنے کی ضرورت ہے۔ انہوں نے کہا کہ جمہوریہ کی طاقت آئین، عوامی ثابت قدمی، پارلیمنٹ، حکومت اور مسلح افواج میں مضمر ہے۔ ملکی خودمختاری کا تحفظ، آئین کی حکمرانی، معاشی ترقی، اور شہریوں کی خوشحالی و امن کے لیے ترقی اور استحکام کو آگے بڑھانا ضروری ہے۔

صدر نے کہا کہ آج ہم انہی بنیادوں پر کھڑے ہیں جو ہماری قومی جدوجہد کے معماروں نے رکھی تھیں۔ قائد اعظم نے آئین اور قانون کی حکمرانی پر مبنی جمہوری ریاست کا تصور پیش کیا، جبکہ شہید ذوالفقار علی بھٹو نے قوم کو متفقہ آئین دیا۔ بے نظیر بھٹو نے قربانی اور مثالی قیادت کے ذریعے جمہوری عمل کو مضبوط کیا۔

صدر نے کہا کہ پارلیمنٹ کی بالادستی کے لیے ان کے اقدامات صرف الفاظ تک محدود نہیں، بلکہ عملی اقدامات سے بھی ظاہر ہیں۔ سلامتی کونسل کی رپورٹ میں افغان دہشت گردوں کو علاقائی خطرے سے بڑھ کر عالمی خطرہ قرار دیا گیا۔ انہوں نے زور دیا کہ کشمیر کی آزادی اور جنوبی ایشیا میں امن کے لیے تمام متعلقہ فریق یکسو اور متحرک رہیں۔