قائداعظم کی قیادت آج بھی رہنمائی کا ذریعہ ہے، تینوں مسلح افواج کا بابائے قوم کو خراجِ عقیدت

پاکستان کی تینوں مسلح افواج نے بانیٔ پاکستان قائداعظم محمد علی جناحؒ کی مثالی قیادت، آئین کی بالادستی اور ثابت قدمی کو موجودہ چیلنجز سے نمٹنے کے لیے مشعلِ راہ قرار دیتے ہوئے بابائے قوم کو زبردست خراجِ عقیدت پیش کیا ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری مشترکہ اعلامیے کے مطابق قائداعظم محمد علی جناحؒ کے یومِ پیدائش کے پُرمسرت موقع پر فیلڈ مارشل، چیف آف آرمی اسٹاف اور چیف آف ڈیفنس فورسز جنرل سید عاصم منیر، چیف آف نیول اسٹاف ایڈمرل نوید اشرف، ایئر چیف مارشل اور چیف آف ایئر اسٹاف سمیت تینوں مسلح افواج نے بابائے قوم کو خراجِ تحسین پیش کیا۔

اعلامیے میں کہا گیا ہے کہ مسلح افواج قائداعظم کے ایمان، اتحاد اور نظم و ضبط کے اصولوں پر مبنی ایک مضبوط، خودمختار، جمہوری اور خوشحال پاکستان کے وژن کے لیے اپنے غیر متزلزل عزم کا اعادہ کرتی ہیں۔

مسلح افواج نے اس امر پر زور دیا کہ قائداعظم کی مثالی قیادت، آئین کی پاسداری اور ثابت قدم عزم عصرِ حاضر کے چیلنجز سے نمٹنے میں قوم اور اس کی افواج کی رہنمائی کرتا ہے۔

اعلامیے کے مطابق پاکستان کی مسلح افواج ملک کی خودمختاری اور علاقائی سالمیت کے تحفظ کے ساتھ ساتھ قائداعظم کے نظریات اور امنگوں کے مطابق قومی استحکام، امن اور ترقی کے لیے پوری لگن سے اپنا کردار ادا کرتی رہیں گی۔

آئی ایس پی آر کے اعلامیے میں مسلح افواج کی جانب سے پاکستان کی مسیحی برادری کو کرسمس کی دلی مبارکباد بھی پیش کی گئی، اور ملکی ترقی میں ان کی گرانقدر خدمات کو سراہتے ہوئے تمام شہریوں کے لیے مساوی حقوق، مذہبی آزادی اور ہم آہنگی کے قائداعظم کے وژن سے وابستگی کا اعادہ کیا گیا۔

ترجمان پاک فوج کے مطابق مسلح افواج قائداعظم محمد علی جناحؒ کی وراثت کو برقرار رکھنے اور قوم کی غیرت، حوصلے اور جذبے کے ساتھ خدمت کے عزم پر ثابت قدم ہیں۔