عارف والا: ڈھائی ماہ قبل اغوا ہونے والی خاتون کی لاش برآمد

عارف والا کے نواحی گاؤں 68 ای بی سے ڈھائی ماہ قبل مبینہ طور پر اغوا ہونے والی طلاق یافتہ خاتون کی لاش کھیتوں سے برآمد کر لی گئی ہے۔

پولیس حکام کے مطابق مقتولہ علشبہ کو اس کے سابق شوہر نے بے دردی سے قتل کرنے کے بعد لاش کو کھیتوں میں دبا دیا تھا۔ تھانہ صدر پولیس نے کارروائی کرتے ہوئے مرکزی ملزم کو گرفتار کیا، جس نے دورانِ تفتیش اپنی سابقہ بیوی کو قتل کرنے کا اعتراف کر لیا ہے۔

پولیس کا کہنا ہے کہ گرفتار ملزم کی نشاندہی پر ہی کھیتوں سے مقتولہ کی لاش برآمد کی گئی، جسے فوری طور پر ضروری قانونی کارروائی اور پوسٹ مارٹم کے لیے ہسپتال منتقل کر دیا گیا ہے۔ پولیس نے واقعے کا مقدمہ درج کر کے مزید تحقیقات کا آغاز کر دیا ہے۔