’’اپنی چھت اپنا گھر پروگرام‘‘ بلاسود قرض جلد واپس کرنے پر رعایت دینے کی سفارش

پنجاب حکومت نے “اپنی چھت اپنا گھر” پروگرام کے تحت بلاسود قرض سے مستفید ہونے والے افراد کے لیے سہولیات میں اضافہ کرنے کا اعلان کیا ہے۔ سیکرٹری ہاؤسنگ کی ہدایت پر ڈی جی پھاٹا سکندر ذیشان کی سربراہی میں ایک اعلیٰ سطح اجلاس منعقد ہوا، جس میں پروگرام ڈائریکٹر مرزا ولید بیگ اور دیگر متعلقہ افسران نے شرکت کی۔

اجلاس کے دوران اخوت، این ایس آر پی اور دیگر مائیکروفنانس اداروں نے عملی تجاویز پیش کیں، جبکہ ڈی جی پھاٹا نے رعایت کے اطلاق کے لیے ایس او پیز جلد مکمل کرنے کی ہدایت جاری کی۔ اجلاس میں سفارش کی گئی کہ پروگرام کے تحت فراہم کیے گئے بلاسود قرض کی جلد واپسی پر مستفید افراد کو 20 فیصد تک رعایت دی جائے، اور دورانِ قرض مدت وفات یا معذوری کی صورت میں بھی رعایت فراہم کی جائے۔

ڈی جی پھاٹا سکندر ذیشان نے کہا کہ وزیراعلیٰ پنجاب کی ہدایت کے مطابق قرض کی واپسی میں مزید آسانیاں پیدا کرنے کی منصوبہ بندی کی جا رہی ہے، اور رعایت کا اطلاق 10 سالہ قرض کی 3 سے 6 سال میں قبل از وقت واپسی پر ہوگا۔

انہوں نے بتایا کہ “اپنی چھت اپنا گھر” پروگرام کے تحت شہریوں کو 10 سال کے لیے 15 لاکھ روپے تک بلاسود قرض فراہم کیا جاتا ہے، اور مجوزہ ایس او پیز جلد صوبائی وزیر بلال یاسین اور سیکرٹری ہاؤسنگ کو پیش کی جائیں گی۔

ڈی جی پھاٹا نے مزید کہا کہ رعایت دینے کا مقصد مستفید شہریوں کے لیے مزید سہولت پیدا کرنا اور وقت سے پہلے واپس ہونے والی رقم سے مزید افراد کو گھر بنانے میں مدد فراہم کرنا ہے۔