اے این ایف کا ملک گیر کریک ڈاؤن, 4 کروڑ سے زائد مالیت کی منشیات برآمد

اینٹی نارکوٹکس فورس (ANF) نے منشیات اسمگلنگ کے خلاف ملک گیر مہم کے دوران مختلف شہروں میں 7 کامیاب کارروائیاں کرتے ہوئے 4 کروڑ 4 لاکھ روپے سے زائد مالیت کی منشیات برآمد کر لی ہے، جبکہ 5 اسمگلروں کو بھی گرفتار کیا گیا ہے۔

ترجمان اے این ایف کے مطابق، ان کارروائیوں کے دوران مجموعی طور پر 316.724 کلوگرام منشیات قبضے میں لی گئی ہے۔ تمام گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر کے باقاعدہ تحقیقات کا آغاز کر دیا گیا ہے۔

 سیالکوٹ ایئرپورٹ پر سعودی عرب جانے والے ایک مسافر کے سامان کی تلاشی کے دوران 7 احراموں میں جذب کی گئی 12.160 کلوگرام آئس (Ice) برآمد کی گئی۔ اسی طرح، فیصل آباد کے ایک کوریئر آفس میں سعودی عرب بھیجے جانے والے پارسل سے کپڑوں میں جذب کی گئی 6.560 کلوگرام آئس برآمد کر کے ایک ملزم کو گرفتار کیا گیا۔  لاہور کے سرحدی علاقے واہگہ گاؤں میں ایک لاوارث ڈرون کی تلاشی لی گئی، جس سے 554 گرام اعلیٰ معیار کی ہیروئن برآمد ہوئی۔ تونسہ ٹول پلازہ کے قریب ایک مسافر بس سے 24 کلوگرام چرس برآمد کر کے ایک ملزم کو دھر لیا گیا، جبکہ سکھر کے شکار پور روڈ پر موٹر سائیکل سوار ملزم سے 10 کلوگرام چرس برآمد ہوئی۔ پشاور رنگ روڈ پر ایک سی این جی اسٹیشن کے قریب گاڑی سے 3.450 کلوگرام آئس برآمد کر کے ایک اور اسمگلر کو گرفتار کیا گیا۔  دالبدین کے قریب ایک کارروائی کے دوران بھاری مقدار میں یعنی 260 کلوگرام چرس برآمد کر کے اسمگلنگ کی بڑی کوشش کو ناکام بنا دیا گیا۔