گوگل نے اینڈرائیڈ 16 میں سکیورٹی خامی کی تصدیق کر دی

ایک تازہ ترین رپورٹ کے مطابق اینڈرائیڈ 16 میں ’آتھنٹیکیشن بائی پاس‘ نامی ایک سنگین سیکیورٹی خامی سامنے آئی ہے، جس کے ذریعے مخصوص حالات میں فون کا لاک سکرین حفاظتی نظام بائی پاس کیا جا سکتا ہے۔ یہ مسئلہ مصنوعی ذہانت کے اسسٹنٹ ’جیمینائی‘ کے لاک سکرین فیچر سے جڑا ہے، جہاں اگر صارف نے واٹس ایپ یا دیگر میسجنگ ایپس تک رسائی بند بھی کر رکھی ہو تو ’ایڈ اٹیچمنٹ‘ اور ’کنٹینیو‘ بٹن کو ایک ساتھ دبا کر پِن (PIN) کی تصدیق کے بغیر ان ایپس کو استعمال کیا جا سکتا ہے۔ رپورٹ کے مطابق یہ خامی مئی سے گوگل کے علم میں ہے اور یہ صرف پکسل فونز تک محدود نہیں بلکہ دیگر برانڈز کی اینڈرائیڈ ڈیوائسز کو بھی متاثر کر سکتی ہے۔ گوگل نے اس مسئلے کی تصدیق کرتے ہوئے صارفین کو جلد اصلاحی اپ ڈیٹ فراہم کرنے کی یقین دہانی کرائی ہے، جبکہ سائبر سیکیورٹی ماہرین نے صارفین کو مشورہ دیا ہے کہ وہ ممکنہ خطرات سے بچنے کے لیے سیکیورٹی اپ ڈیٹ آتے ہی اپنا فون فوری اپ ڈیٹ کریں۔