افغانستان میں چھوڑا گیا امریکی اسلحہ خطے کی سیکیورٹی کیلئے خطرہ بن گیا

امریکی افواج کے افغانستان سے انخلا کے بعد وہاں چھوڑا گیا جدید امریکی اسلحہ خطے کی سیکیورٹی کے لیے ایک سنگین خطرہ بنتا جا رہا ہے۔ امریکی جریدے کے مطابق افغان طالبان رجیم کی مبینہ سرپرستی میں دہشت گرد گروہ اس اسلحے کو ہمسایہ ممالک میں دہشت گردی کے لیے استعمال کر رہے ہیں۔

امریکی جریدے دی جیو پالیٹکس کی رپورٹ میں کہا گیا ہے کہ پاکستان میں سرگرم دہشت گرد تنظیم ٹی ٹی پی (فتنہ الخوارج) افغانستان میں موجود امریکی ہتھیاروں کے ذریعے پاکستان میں سیکیورٹی فورسز اور شہریوں کو نشانہ بنا رہی ہے۔

رپورٹ کے مطابق خیبرپختونخوا کے مختلف علاقوں میں ہونے والی دہشت گرد کارروائیوں میں جدید امریکی اسلحہ استعمال کیے جانے کے شواہد سامنے آئے ہیں، جس سے علاقائی سلامتی کے خدشات میں اضافہ ہو گیا ہے۔