“ایران پر حملہ گریٹر مڈل ایسٹ کی جانب قدم ہے”: اپوزیشن لیڈر علامہ راجہ ناصر عباس کی عالمی خاموشی اور امریکی جارحیت پر کڑی تنقید

مجلس وحدت مسلمین کے سربراہ اور اپوزیشن لیڈر علامہ راجہ ناصر عباس نے ایران پر مسلط کردہ حالیہ جنگ اور عالمی اداروں کی بے حسی پر شدید تشویش کا اظہار کرتے ہوئے کہا ہے کہ امریکی صدر اور نیتن یاہو مسلسل اقوامِ متحدہ کی قراردادوں کی دھجیاں اڑا رہے ہیں۔ انہوں نے خبردار کیا کہ ایران پر حملہ دراصل ‘گریٹر مڈل ایسٹ’ کے ایجنڈے کی تکمیل کی جانب ایک قدم ہے اور دو ایٹمی قوتوں کا ایران کے ایٹمی پروگرام کو نشانہ بنانا خطے کے امن کے لیے تباہ کن ثابت ہوگا۔ علامہ راجہ ناصر عباس نے کہا کہ اقوامِ متحدہ سمیت پوری دنیا اس جنگ کو روکنے میں ناکام ہو چکی ہے، جبکہ اس تنازع کے اثرات سے پاکستان بھی براہِ راست متاثر ہو رہا ہے۔

اپوزیشن لیڈر نے جنگ روکنے اور امن کے قیام کے لیے پاکستان کے سفارتی کردار کو خوش آئند قرار دیا، تاہم انہوں نے سوال اٹھایا کہ ڈونلڈ ٹرمپ اور نیتن یاہو کی جانب سے امن کے کسی معاہدے کی گارنٹی کون دے گا؟ ان کا کہنا تھا کہ خدانخواستہ اگر ایران کو نقصان پہنچا تو اس کے اثرات صرف ایک ملک تک محدود نہیں رہیں گے بلکہ پورا خطہ اس کی لپیٹ میں آ جائے گا۔ انہوں نے عالمی برادری پر زور دیا کہ وہ خاموشی توڑ کر اس جارحیت کو روکے، ورنہ خطے میں طاقت کا توازن بگڑنے سے ناقابلِ تلافی نقصان ہوگا۔