علامہ راجہ ناصر عباس جعفری کی سربراہی میں تحریک تحفظ آئین پاکستان کے وفد کی شاہد خاقان عباسی سے ملاقات، اے پی سی میں شرکت کی دعوت

اسلام آباد میں قائد حزبِ اختلاف سینیٹ اور مجلس وحدت مسلمین پاکستان کے سربراہ سینیٹر علامہ راجہ ناصر عباس جعفری کی قیادت میں ‘تحریک تحفظ آئین پاکستان’ کے ایک وفد نے سابق وزیراعظم اور عوام پاکستان پارٹی کے سربراہ شاہد خاقان عباسی سے ان کی رہائش گاہ پر ملاقات کی۔ اس موقع پر وفد میں تحریک کے وائس چیئرمین و سابق سینیٹر مصطفیٰ نواز کھوکھر اور ترجمان اخونزادہ حسین احمد یوسفزئی بھی موجود تھے۔ ملاقات کے دوران ملک کی مجموعی سیاسی صورتحال، جمہوریت کے فروغ، آئین کی بالادستی اور قومی معاملات پر تفصیلی تبادلۂ خیال کیا گیا، جبکہ وفد نے شاہد خاقان عباسی کو تحریک کے زیرِ اہتمام منعقد ہونے والی آل پارٹیز کانفرنس (APC) میں شرکت کی باضابطہ دعوت بھی دی۔ رہنماؤں نے اس عزم کا اعادہ کیا کہ ملک میں سیاسی استحکام اور جمہوری روایات کی پختگی کے لیے تمام سیاسی قوتوں کے درمیان باہمی مشاورت کا سلسلہ جاری رکھا جائے گا۔