آئین اور جمہوریت کو بچانے کے لیے سب کو ایک ہونا ہوگا: ناہید خان

محترمہ بینظیر بھٹو کی دیرینہ ساتھی ناہید خان نے گڑھی خدا بخش میں میڈیا سے گفتگو کرتے ہوئے کہا کہ کل محترمہ بینظیر بھٹو کی برسی ہے اور اس موقع پر پورے پاکستان سے کارکنان بڑی تعداد میں لاڑکانہ پہنچے ہیں۔ انہوں نے کہا کہ آج ملک کے بچوں کو تعلیم میسر نہیں اور سیاست عوام سے دور ہوتی جا رہی ہے۔

ناہید خان کا کہنا تھا کہ شہید ذوالفقار علی بھٹو نے سیاست کو خاندانوں سے نکال کر عوام تک پہنچایا اور 1973 کا آئین ہی ملک کو متحد رکھ سکتا ہے، مگر آج اس آئین کی دھجیاں اڑائی جا رہی ہیں۔ انہوں نے کہا کہ فوج کا کام ملک کا دفاع ہے، سیاست نہیں، اور اداروں کو متنازع بنایا جا رہا ہے۔

انہوں نے مزید کہا کہ ملک میں گالی گلوچ اور دھمکیوں کا سلسلہ بند ہونا چاہیے، ججوں کو آزاد ہو کر فیصلے کرنے چاہئیں اور سزا جرم ثابت ہونے کے بعد ہی دی جانی چاہیے۔ ناہید خان نے زور دیا کہ عوام طاقت کا سرچشمہ ہیں، آئین کو بچانے کے لیے سب کو متحد ہونا ہوگا اور شہید ذوالفقار علی بھٹو اور محترمہ بینظیر بھٹو کے خواب کو پورا کرنے دینا چاہیے۔