ایران کے قومی سلامتی کے مشیر علی لاریجانی اور بیٹے مرتضیٰ کی شہادت کی تصدیق

ایران نے قومی سلامتی کے مشیر علی لاریجانی کی شہادت کی تصدیق کر دی ہے۔ عرب میڈیا کے مطابق ایرانی حکام نے علی لاریجانی کے بیٹے مرتضیٰ کے شہید ہونے کی بھی تصدیق کی ہے۔ قبل ازیں علی لاریجانی کے سوشل میڈیا اکاؤنٹ سے ہاتھ سے لکھا پیغام جاری کیا گیا تھا جس میں شہدا کو خراج عقیدت پیش کیا گیا۔

اسرائیل نے گزشتہ روز علی لاریجانی کو نشانہ بنانے کا دعویٰ کیا تھا۔ شہید علی لاریجانی عراق کے شہر نجف میں پیدا ہوئے اور ایران کی پاسداران انقلاب میں شمولیت کے بعد اسلامی جمہوریہ ایران میں نمایاں مقام حاصل کیا۔ وہ ایران کی داخلی سیاست، پارلیمنٹ اور خارجہ پالیسی میں طویل عرصے سے بااثر کردار ادا کرتے رہے۔

علی لاریجانی انقلابِ ایران کے بعد ابھرنے والی اہم سیاسی شخصیات میں شامل تھے۔ انہوں نے بطور اسپیکر پارلیمنٹ 12 سال تک مجلسِ شورٰی کی قیادت کی اور ایران کے چیف مذاکرات کار برائے جوہری پروگرام بھی رہ چکے ہیں۔