انتظامی یونٹس بنانے کی ہماری بات 12 سال بعد سب کو سمجھ آ گئی: علی خورشیدی

اپوزیشن لیڈر سندھ اسمبلی علی خورشیدی نے میڈیا سے گفتگو کرتے ہوئے کہا کہ نئے انتظامی یونٹس بنانے سے متعلق ایم کیو ایم کی موقف پر مبنی بات بارہ سال بعد تمام تر سیاسی حلقوں کی سمجھ میں آ گئی ہے، اور آج پورا پاکستان نئے انتظامی یونٹس کے قیام پر کھل کر بات کر رہا ہے۔ انہوں نے کہا کہ انتظامی اصلاحات کے بغیر ملک اور خاص طور پر شہری علاقوں کے مسائل کا حل ممکن نہیں رہا۔

علی خورشیدی نے سندھ حکومت اور موجودہ انتظامی ڈھانچے کو شدید تنقید کا نشانہ بناتے ہوئے کہا کہ 18 ویں آئینی ترمیم کی منظوری سے قبل کراچی کا شمار دنیا کے 12 ترقی یافتہ اور متحرک شہروں میں ہوتا تھا، لیکن ناقص حکمتِ عملی اور وسائل کی غیر مساوی تقسیم کے باعث اب کراچی دنیا کے تیسرے بدترین شہروں کی فہرست میں شامل ہو چکا ہے۔ انہوں نے مزید کہا کہ شہر میں صرف انفراسٹرکچر کو تباہ نہیں کیا گیا بلکہ معیشت سمیت تمام بنیادی شعبوں کو خراب کرنے کی منظم کوشش کی جا رہی ہے، جس سے ملک کا معاشی حب شدید بحران کا شکار ہے۔