علیمہ خان کا روزانہ سماعت اور بانی پی ٹی آئی کے فوری طبی معائنے کا مطالبہ

راولپنڈی کی انسدادِ دہشت گردی عدالت کے باہر میڈیا سے گفتگو کرتے ہوئے بانی پی ٹی آئی کی ہمشیرہ علیمہ خان اور وکیل فیصل ملک نے اہم قانونی اور سیاسی مطالبات سامنے رکھے ہیں۔ وکیل فیصل ملک نے بتایا کہ دفاعی ٹیم نے عدالت میں ایک نئی درخواست دائر کی ہے، جس کے تحت دفاع کی جانب سے پیش کردہ یو ایس بی (USB) کا فرانزک کسی غیر سرکاری، غیر جانبدار بین الاقوامی لیبارٹری سے کرانے کی استدعا کی گئی ہے، کیونکہ انہیں سرکاری فرانزک لیبارٹریز پر تحفظات ہیں۔ اس یو ایس بی میں وزراء، صحافیوں اور مختلف میڈیا چینلز کی اہم ویڈیوز اور رپورٹس موجود ہیں، اور دفاع کا مطالعہ ہے کہ فرانزک رپورٹ کے بعد ان تمام کرداروں کو بطور کورٹ وٹنس (Court Witness) طلب کر کے جرح کا موقع دیا جائے۔ دوسری جانب علیمہ خان نے مقدمے میں تاخیر پر شدید تشویش کا اظہار کرتے ہوئے کہا کہ پہلے ہم پر پیش نہ ہونے کا الزام لگایا جاتا تھا لیکن اب اچانک سماعت 11 اگست تک ملتوی کر کے کیس کو غیر ضروری طور پر لٹکایا جا رہا ہے، انہوں نے مطالبہ کیا کہ روزانہ سماعت کر کے کیس کا جلد فیصلہ کیا جائے۔ علیمہ خان نے بانی پی ٹی آئی کی قیدِ تنہائی ختم کرنے، فیملی اور ذاتی معالج کی موجودگی میں ان کی آنکھوں کے فوری طبی معائنے اور تمام آئینی حقوق کی بحالی کا مطالبہ کیا۔ انہوں نے مزید کہا کہ اڈیالہ جیل کے باہر عوام کی شرکت سے خوف کا ماحول ٹوٹا ہے اور اگر بانی پی ٹی آئی کی رہائی اور ملک میں رول آف لا کے لیے موجودہ دباؤ کافی نہیں، تو احتجاج اور عوامی دباؤ میں مزید اضافہ کرتے ہوئے جلد ہی اگلے مرحلے کی تحریک شروع کی جائے گی