فرانس کے بعد البانیہ میں طلبہ سڑکوں پر، تعلیم اور روزگار کے مسائل پر احتجاج

فرانس کے بعد اب یورپی ملک البانیہ میں بھی طلبہ اور جوانوں کی بڑی تعداد سڑکوں پر نکل آئی ہے، جہاں تعلیمی نظام کی زبوں حالی، ڈگریوں کے اخراجات میں اضافے اور روزگار کی عدم دستیابی کے خلاف شدید عوامی احتجاج دیکھنے میں آ رہا ہے۔

دارالحکومت تیرانا میں مظاہرین کی جانب سے سرکاری عمارتوں کی طرف پیش قدمی کے دوران پولیس اور مظاہرین میں شدید جھڑپیں ہوئیں۔ امن و امان برقرار رکھنے کے لیے پولیس نے مشتعل طلبہ پر آنسو گیس کے شیل داغے اور واٹر کیننز کا بے دریغ استعمال کیا، جس کے بعد متعدد طالب علموں کو حراست میں لے لیا گیا ہے۔ احتجاج کرنے والے طلبہ کا مطالبہ ہے کہ جامعات میں بنیادی سہولیات کی فراہمی کو یقینی بنایا جائے، اعلیٰ تعلیم کے تعلیمی اخراجات اور فیسوں میں کمی کی جائے اور طلبہ کے لیے مالی معاونت و اسکارلشپ کے بجٹ میں نمایاں اضافہ کیا جائے۔

البانیہ کی نائب وزیراعظم نے حالات کی سنگینی کو دیکھتے ہوئے مظاہرین سے فوری طور پر پرامن رہنے اور تشدد سے گریز کی اپیل کی ہے۔ اپنے بیان میں انہوں نے واضح کیا کہ تشدد، سرکاری اداروں پر حملے اور املاک کو نقصان پہنچانا مسائل کا حل نہیں ہے اور حکومت مذاکرات کے ذریعے طلبہ کے خدشات اور مطالبات کا جائزہ لینے کے لیے تیار ہے۔