مسجد اقصیٰ میں اسرائیلی آبادکاروں کی دراندازی اور پرچم لہرانے کی شدید مذمت، 8ممالک کا مشترکہ اعلامیہ

مسجد اقصیٰ میں اسرائیلی آبادکاروں کی دراندازی اور اسرائیلی پرچم لہرانے کے واقعے پر آٹھ ممالک کے وزرائے خارجہ نے شدید مذمت کرتے ہوئے اسے خطے میں کشیدگی بڑھانے کی کوشش قرار دیا ہے۔

ترجمان دفتر خارجہ کے مطابق مشترکہ اعلامیے میں وزرائے خارجہ نے مقبوضہ مشرقی یروشلم کی تاریخی اور قانونی حیثیت تبدیل کرنے کی تمام کوششوں کو مسترد کرتے ہوئے ان اقدامات کو اشتعال انگیز قرار دیا۔

اعلامیے میں کہا گیا ہے کہ یروشلم کا تاریخی اور قانونی اسٹیٹس برقرار رہنا چاہیے جبکہ مسجد اقصیٰ کا پورا احاطہ صرف مسلمانوں کی عبادت کے لیے مخصوص ہے۔

وزرائے خارجہ نے واضح کیا کہ مسجد اقصیٰ کے انتظامی اور مذہبی امور کی ذمہ داری اردن کے محکمہ اوقاف کے پاس ہے اور اس میں کسی قسم کی مداخلت ناقابل قبول ہے۔

مشترکہ اعلامیے میں اسرائیل سے فوری طور پر تمام اشتعال انگیز اقدامات روکنے کا مطالبہ کیا گیا ہے اور کہا گیا ہے کہ ایسی کارروائیاں خطے میں عدم استحکام کو مزید بڑھا رہی ہیں۔

آٹھ ممالک کے وزرائے خارجہ نے فلسطینی عوام کے ساتھ مکمل یکجہتی کا اظہار کرتے ہوئے مشرقی یروشلم کو فلسطینی ریاست کا دارالحکومت بنانے پر زور دیا۔