اکوڑہ خٹک میں سابق افغان مہاجر کیمپ سے 7 کلو وزنی خودکش جیکٹ برآمد

خیبر پختونخوا کے علاقے اکوڑہ خٹک میں پولیس نے بروقت کارروائی کرتے ہوئے سابق افغان مہاجر کیمپ سے بھاری وزنی خودکش جیکٹ برآمد کر کے دہشت گردی کا بڑا منصوبہ ناکام بنا دیا۔

ڈی ایس پی اکوڑہ خٹک عدنان اعظم کے مطابق، پولیس کو سابق افغان مہاجر کیمپ “شنہ ونہ” کے مقام پر ایک مشکوک بوری کی موجودگی کی اطلاع ملی تھی، جس پر کارروائی کرتے ہوئے پولیس ٹیم نے فوری طور پر موقع پر پہنچ کر مشکوک بوری کو اپنی تحویل میں لے لیا۔ بوری کی تلاشی کے دوران اس میں سے ایک تیار خودکش جیکٹ برآمد ہوئی، جس کا وزن تقریباً 07 کلو گرام تھا۔ خطرے کے پیشِ نظر فوری طور پر بم ڈسپوزل یونٹ (BDU) کو طلب کیا گیا جنہوں نے پیشہ ورانہ مہارت کا مظاہرہ کرتے ہوئے خودکش جیکٹ کو محفوظ طریقے سے اپنے قبضے میں لے لیا۔ پولیس حکام کا مزید کہنا ہے کہ اس سنگین واقعے کی ہر پہلو سے تحقیقات شروع کر دی گئی ہیں اور علاقے میں سرچ آپریشن جاری ہے۔ پولیس کا عزم ہے کہ اس سازش کے پیچھے چھپے ذمہ داروں کا سراغ لگا کر انہیں جلد از جلد حراست میں لے لیا جائے گا۔