پی ٹی آئی اور کالعدم ٹی ٹی پی ایک ہی سکے کے دو رخ ہیں: اختیار ولی

وزیراعظم کے کوآرڈی نیٹر برائے اطلاعات خیبرپختونخوا اختیار ولی خان نے الزام عائد کیا ہے کہ پاکستان تحریک انصاف (پی ٹی آئی) اور کالعدم تحریک طالبان پاکستان (ٹی ٹی پی) کے درمیان گٹھ جوڑ کے واضح شواہد موجود ہیں اور دونوں جماعتیں ایک ہی سکے کے دو رخ ہیں۔ اپنے ایک سخت بیان میں انہوں نے دعویٰ کیا کہ پی ٹی آئی نے ٹی ٹی پی کو اپنا عسکری ونگ جبکہ ٹی ٹی پی نے پی ٹی آئی کو اپنا سیاسی ونگ بنا رکھا ہے۔ انہوں نے انکشاف کیا کہ وزیراعلیٰ خیبرپختونخوا سہیل آفریدی کے ساتھ ویڈیو میں نظر آنے والے نوجوان ذاکر اللہ کا تعلق کالعدم تنظیم سے ہے، جس کی تصاویر پی ٹی آئی کے متعدد اراکینِ اسمبلی کے ساتھ بھی موجود ہیں۔

اختیار ولی خان نے پی ٹی آئی پر دہشت گرد عناصر کی فنڈنگ، اسپانسرنگ اور سہولت کاری کے سنگین الزامات عائد کرتے ہوئے کہا کہ اسلام آباد مارچ اور دھرنوں میں خارجی عناصر کی شمولیت کے شواہد ملے ہیں۔ انہوں نے کہا کہ خیبرپختونخوا میں دہشت گردی اور شہادتوں میں مسلسل اضافہ ہو رہا ہے جبکہ صوبائی حکومت کالعدم تنظیموں کے نمائندے کے طور پر کام کر رہی ہے۔ انہوں نے پی ٹی آئی رہنماؤں سے مطالبہ کیا کہ وہ ‘عشقِ بانی’ کی آڑ میں 9 مئی اور اسلام آباد پر یلغار جیسے انتشاری اقدامات اور دہشت گرد گروہوں کے ساتھ تعلقات پر قوم کے سامنے اپنا موقف واضح کریں۔