پی ٹی آئی انتشار کی سیاست کر رہی، ریاست یرغمال بنانے نہیں دیں گے: اختیار ولی

وزیرِ اعظم کے کوآرڈینیٹر اختیار ولی اور مسلم لیگ (ن) کے رہنما بیرسٹر دانیال چوہدری نے پریس کانفرنس کرتے ہوئے کہا ہے کہ ریاست کو کسی صورت یرغمال بنانے کی اجازت نہیں دی جائے گی۔ اختیار ولی نے شدید تنقید کرتے ہوئے کہا کہ پاکستان تحریک انصاف (پی ٹی آئی) ملک میں مسلسل انتشار کی سیاست کو فروغ دے رہی ہے اور پشتون کارڈ استعمال کر کے منفی پراپیگنڈا کر رہی ہے۔ ان کا کہنا تھا کہ گزشتہ دو سالوں کے دوران خیبر پختونخوا میں دہشت گردی کے ہزاروں واقعات پیش آ چکے ہیں، مگر صوبائی حکومت امن و امان کے قیام میں سنجیدہ نہیں، حتیٰ کہ صوبے کی کاؤنٹر ٹیررازم ڈیپارٹمنٹ (CTD) شدید ہتھیاروں اور وسائل کی کمی کا شکار ہے۔

دوسری جانب بیرسٹر دانیال چوہدری نے گفتگو کرتے ہوئے کہا کہ وفاقی حکومت مفاہمت کی پالیسی پر کاربند ہے، لیکن پی ٹی آئی نے جان بوجھ کر سیاسی مذاکرات کے عمل کو سبوتاژ کیا۔ انہوں نے الزام عائد کیا کہ پی ٹی آئی خیبر پختونخوا میں گزشتہ 15 سالوں سے قائم اپنی حکومت کے دوران بدعنوانی کو فروغ دیتی رہی ہے اور اب اپنے شہدا کو نظر انداز کر کے صرف اقتدار کے حصول اور عوام کو گمراہ کرنے کی کوششوں میں مصروف ہے۔