آزاد کشمیر میں کالعدم جوائنٹ ایکشن کمیٹی کی 5 جولائی کی کال مسترد

آزاد جموں و کشمیر کے شہریوں نے کالعدم جوائنٹ ایکشن کمیٹی کی جانب سے 5 جولائی کو دی جانے والی ہڑتال کی کال کو مکمل طور پر مسترد کر دیا ہے، جس کے بعد ریاست بھر میں روزمرہ کے معمولاتِ زندگی اور کاروباری سرگرمیاں معمول کے مطابق جاری ہیں۔

آزاد کشمیر کے مختلف شہروں سے سامنے آنے والی اطلاعات کے مطابق، تمام چھوٹی بڑی مارکیٹیں، تجارتی مراکز، بازار، سرکاری و نجی دفاتر اور تعلیمی ادارے معمول کے مطابق کھلے ہیں۔ مقامی شہریوں اور تاجروں کا کہنا ہے کہ ہڑتال کی یہ کال دراصل کالعدم ایکشن کمیٹی کی جانب سے پرتشدد کارروائیوں اور وادی میں انتشار پھیلانے کی ایک اور مذموم کوشش تھی جسے عوام نے یکسر رد کر دیا ہے۔ انہوں نے شہریوں سے اپیل کی ہے کہ وہ ایسی کسی بھی جھوٹی افواہ پر دھیان نہ دیں اور اپنے کاروباری معاملات کو بلا خوف و خطر جاری رکھیں۔

ریاست کے باشعور شہریوں کا موقف ہے کہ کالعدم ایکشن کمیٹی کی ماضی کی منفی سرگرمیوں اور ہڑتالوں کے باعث آزاد جموں و کشمیر کو پہلے ہی شدید معاشی اور سماجی نقصان اٹھانا پڑا ہے، اس لیے یہاں کے عوام اب مزید کسی انتشار، بدامنی یا جلاؤ گھیراؤ کی سیاست کا حصہ بننے کے لیے ہرگز تیار نہیں ہیں۔ عوام نے واضح پیغام دیا ہے کہ وہ گمراہ کن پروپیگنڈے اور تخریب کاری کے بجائے ریاست کے امن، استحکام اور اقتصادی ترقی کے ساتھ کھڑے ہیں۔