سکیورٹی خدشات، ٹرمپ کے گالف کلب میں فضائی دفاعی نظام تعینات

امریکی دفاعی ویب سائٹ ‘دی وار زون’ کے مطابق ڈرون اور میزائل حملوں کے ممکنہ خطرات کے پیشِ نظر امریکی صدر ڈونلڈ ٹرمپ کے نیو جرسی میں واقع بیڈمنسٹر گالف کلب پر جدید ایونجر (Avenger) فضائی دفاعی نظام اور سینٹینل ریڈار تعینات کر دیا گیا ہے۔ شائع شدہ رپورٹس کے مطابق ٹرمپ کی گالف کھیلنے کے دوران وائرل ہونے والی ان ویڈیوز اور تصاویر کی وائٹ ہاؤس نے بھی تصدیق کر دی ہے۔ اس دوران سیکیورٹی خدشات اس وقت مزید بڑھ گئے جب نارتھ امریکن ایرو اسپیس ڈیفنس کمانڈ (NORAD) کے F-16 لڑاکا طیاروں کو عارضی ‘نو فلائی زون’ کی خلاف ورزی کرنے والے 2 سویلین طیاروں کو بحفاظت ممنوعہ حدود سے باہر نکالنا پڑا۔ وائٹ ہاؤس کی جانب سے جاری کردہ ایک ویڈیو میں جب ٹرمپ نے مذاقاً میزائل اور ڈرون خطرات کا ذکر کیا تو فوجی اہلکار نے جواب دیا کہ تمام تر حفاظتی تدابیر پہلے ہی مکمل کی جا چکی ہیں۔