برآمدات میں اضافے کے لیے سب کو مل کر کام کرنا ہوگا: احسن اقبال

وفاقی وزیر منصوبہ بندی احسن اقبال نے کہا ہے کہ پاکستان کی برآمدات میں اضافے اور معاشی استحکام کے لیے تمام متعلقہ فریقوں کو مل کر کام کرنا ہو گا۔ لاہور میں ’’اقدار پر مبنی معاشرہ‘‘ کے عنوان سے گول میز اجلاس سے خطاب کرتے ہوئے انہوں نے کہا کہ ٹیکسٹائل کا شعبہ ملکی برآمدات میں ریڑھ کی ہڈی کی حیثیت رکھتا ہے، اور عالمی منڈیوں میں مصنوعات کی زیادہ قیمت حاصل کرنے کے لیے جدید ٹیکنالوجی کو اپنا کر معیاری برانڈز متعارف کرانا ناگزیر ہے۔ احسن اقبال نے واضح کیا کہ حالیہ بجٹ میں ایکسپورٹرز کے لیے خصوصی مراعات دی گئی ہیں تاکہ پیداواری لاگت کم کر کے عالمی سطح پر پاکستان کی مسابقتی صلاحیت کو بہتر بنایا جا سکے، جن سے فائدہ اٹھا کر ملک کو پائیدار ترقی کی راہ پر گامزن کیا جا سکتا ہے۔