وفاقی وزیر احسن اقبال کی سلیکون ویلی میں اہم ملاقاتیں؛ 2035 تک پاکستان کو 1 ٹریلین ڈالر کی معیشت بنانے کا ہدف

وفاقی وزیر برائے منصوبہ بندی، ترقی و خصوصی اقدامات احسن اقبال نے اپنے دورۂ شمالی کیلیفورنیا (امریکہ) کے دوران پاکستانی برادری اور سلیکون ویلی کی قیادت سے اہم ملاقاتیں کی ہیں، جس میں مصنوعی ذہانت (AI)، اختراع اور کاروباری سرگرمیوں کے فروغ کے لیے تعاون بڑھانے پر اتفاق کیا گیا ہے۔ پاکستانی برادری سے خطاب کرتے ہوئے وفاقی وزیر نے سیاسی وابستگیوں سے بالاتر ہو کر “پاکستان سب سے مقدم” کے قومی پیغام کو اپنانے پر زور دیا اور بتایا کہ حکومت کے “اُڑان پاکستان” پروگرام کے تحت 2035 تک پاکستان کو 1 ٹریلین ڈالر کی معیشت اور برآمدات کو 100 ارب ڈالر تک لے جانے کا ہدف مقرر کیا گیا ہے۔ انہوں نے واضح کیا کہ ملک میں مصنوعی ذہانت، سائبر سکیورٹی اور روبوٹکس کے قومی مراکزِ امتیاز قائم کیے جا رہے ہیں۔ دورے کے دوران احسن اقبال نے سلیکون ویلی کے معروف ادارے ‘پلگ اینڈ پلے ٹیک سینٹر’ کے سی ای او سعید امیدی سے بھی ملاقات کی، جس نے پاکستان کی 10 جامعات کے 300 نئے کاروباری منصوبوں (Startups) کی رہنمائی، عالمی کمپنیوں سے رابطے اور اسلام آباد و کراچی میں دفاتر قائم کرنے کی پیشکش کی ہے، جسے وفاقی وزیر نے پاکستان کے نوجوان انجینئرز اور آئی ٹی سیکٹر کے لیے ایک شاندار موقع قرار دیا۔