بھارت نے چناب کے بعد دریائے جہلم اور دریائے نیلم کا پانی بھی روک دیا

اسلام آباد: بھارت نے دریائے چناب کے بعد دریائے جہلم اور دریائے نیلم کا پانی بھی روک دیا ہے، جس کے باعث دونوں دریاؤں میں پانی کی آمد خطرناک حد تک کم ہو گئی ہے۔ ذرائع کے مطابق دریائے جہلم اور نیلم میں پانی کی آمد کم ہو کر صرف 3 ہزار کیوسک رہ گئی ہے، جبکہ چار روز قبل یہ مقدار 5 ہزار کیوسک سے زائد تھی۔

انڈس واٹر کمیشن کے ذرائع کا کہنا ہے کہ دریاؤں کا پانی روکنا سندھ طاس معاہدے کی صریح خلاف ورزی ہے۔ ذرائع کے مطابق دریائے چناب اور دریائے جہلم میں پانی کا بہاؤ تاریخ کی کم ترین سطح پر آ چکا ہے۔

ذرائع نے بتایا کہ دریائے چناب میں چار روز قبل پانی کی آمد 10 ہزار کیوسک تھی جو اب کم ہو کر 5 ہزار کیوسک رہ گئی ہے، جبکہ ہیڈ مرالہ کے مقام پر پانی کا اخراج صفر ہو چکا ہے۔ انڈس واٹر کمیشن کے مطابق دریائے چناب سے قادرآباد اور خانکی بیراج سے نکلنے والی نہروں کو پانی کی فراہمی ممکن نہیں رہے گی۔

آبی ماہرین نے خبردار کیا ہے کہ بھارت کی جانب سے پانی روکے جانے کی صورت میں پنجاب کی لاکھوں ایکڑ زرعی زمین بنجر ہونے کا خدشہ ہے۔ ماہرین کا کہنا ہے کہ انڈس واٹر کمیشن کو بھارت کے اس اقدام کے خلاف عالمی ثالثی عدالت سے فوری رجوع کرنا چاہیے