افغان سرزمین سے خوارج کے حملے پر افغان ڈپٹی ہیڈ آف مشن کی دفتر خارجہ طلبی، پاکستان کا سخت ڈی مارش

پاکستان نے افغان سرزمین سے خوارج کے حملے میں چار پاکستانی فوجیوں کی شہادت کے معاملے پر افغان ڈپٹی ہیڈ آف مشن کو دفتر خارجہ طلب کر کے باضابطہ ڈی مارش دیا ہے۔

دفتر خارجہ کی جانب سے جاری بیان کے مطابق پاکستان نے اس موقع پر افغان حکام پر واضح کیا کہ افغان طالبان فتنہ الخوارج اور کالعدم تحریک طالبان پاکستان (ٹی ٹی پی) کی معاونت کر رہے ہیں، جو خطے کے امن کے لیے سنگین خطرہ ہے۔

بیان میں افغانستان میں دہشت گردوں کو حاصل محفوظ پناہ گاہوں پر شدید تشویش کا اظہار کیا گیا اور افغان سرزمین سے پاکستان کے خلاف ہونے والی دہشت گردی پر مکمل تحقیقات اور مؤثر کارروائی کا مطالبہ کیا گیا۔

دفتر خارجہ کے مطابق پاکستان نے افغان طالبان سے مطالبہ کیا ہے کہ تمام دہشت گرد گروہوں کے خلاف فوری اور قابلِ تصدیق اقدامات کیے جائیں۔

بیان میں واضح کیا گیا کہ پاکستان اپنی خود مختاری اور قومی سلامتی کے دفاع کا حق محفوظ رکھتا ہے۔