اڈیالہ جیل: رات گئے ایک مرتبہ پھر پولیس کا کریک ڈاٶن، واٹر کینن کا استعمال

راولپنڈی میں پولیس نے رات گئے ایک بار پھر کریک ڈاؤن کرتے ہوئے اڈیالہ جیل کے قریب پاکستان تحریک انصاف کے بانی عمران خان کی بہنوں اور پارٹی کارکنان کا دھرنا ختم کروا دیا۔

پولیس کی جانب سے مظاہرین کو منتشر کرنے کے لیے واٹر کینن کا استعمال کیا گیا، جس کے باعث دھرنے میں موجود کارکنان منتشر ہو گئے۔

دھرنے کے مقام پر پی ٹی آئی قیادت سے اظہارِ یکجہتی کے لیے علامہ راجہ ناصر عباس بھی پہنچے تاہم وہ بھی واٹر کینن کی زد میں آ گئے۔

علیمہ خان نے دعویٰ کیا کہ اس مرتبہ مظاہرین پر کیمیکل ملا پانی پھینکا گیا ہے۔ ان کا کہنا تھا کہ چاہے جتنا بھی دباؤ یا ظلم کیا جائے، وہ اپنے مؤقف پر قائم رہیں گے اور پیچھے نہیں ہٹیں گے۔

پولیس کارروائی کے بعد اڈیالہ جیل کے اطراف سکیورٹی مزید سخت کر دی گئی ہے جبکہ علاقے میں صورتحال مکمل طور پر کنٹرول میں بتائی جا رہی ہے۔