ابوظبی میں 3روز سے پھنسے مسافروں کی روانگی، متعدد ایئرلائنز کی خصوصی پروازیں

ابوظبی انٹرنیشنل ایئر پورٹ پر تین دن سے موجود ٹرانزٹ مسافروں کو ان کی منزلوں تک پہنچانے کیلئے خصوصی اور عارضی پروازوں کا سلسلہ شروع کر دیا گیا ہے۔ حکام کے مطابق یہ محدود آپریشن 4 مارچ تک جاری رہے گا۔

اتحاد ایئر ویز نے ہنگامی انتظامات کے تحت چند گھنٹوں میں اٹھارہ پروازیں روانہ کیں۔ ان میں کارگو اور مسافر دونوں اقسام کے طیارے شامل تھے۔ اتحاد کی پروازیں یورپ، مشرق وسطیٰ اور جنوبی ایشیا کے مختلف شہروں کی جانب بھیجی گئیں تاکہ متاثرہ مسافروں کو جلد از جلد سہولت فراہم کی جا سکے۔

روانہ ہونے والے شہروں میں لندن، ایمسٹرڈیم، میونخ، کراچی، اسلام آباد، ممبئی، ماسکو، پیرس، مسقط، بنگلور، دہلی، جدہ، دمام، ریاض اور قاہرہ شامل ہیں۔ ایئرلائن کے مطابق ترجیح ان مسافروں کو دی گئی جو گزشتہ تین روز سے ایئرپورٹ پر موجود تھے۔

ادھر Emirates نے بھی محدود پروازوں کی بحالی کا اعلان کیا ہے۔ ایئرلائن انتظامیہ کا کہنا ہے کہ پہلے سے تصدیق شدہ بکنگ رکھنے والے مسافروں کو مرحلہ وار روانہ کیا جائے گا اور انہیں براہ راست مطلع کیا جائے گا۔

علاوہ ازیں IndiGo اور Lufthansa کی پروازیں بھی روانہ کی گئیں۔ حکام نے واضح کیا ہے کہ محدود آپریشن مکمل ہونے کے بعد چار مارچ کی دوپہر دو بجے تک فضائی سرگرمیاں دوبارہ معطل کر دی جائیں گی۔

دوسری جانب دبئی سے بھی چند پروازیں بھارت، دوحہ، روم اور جرمنی کے شہر لیپزگ کیلئے روانہ کی جائیں گی، جن میں کارگو پرواز بھی شامل ہے۔