ایبٹ آباد میں خوفناک ٹریفک حادثہ، 14 بچوں سمیت 20 افراد زخمی

ایبٹ آباد کے علاقے دھمتوڑ بائی پاس پر تیز رفتاری کے باعث ایک سوزوکی وین خوفناک ٹریفک حادثے کا شکار ہو گئی ہے، جس کے نتیجے میں ہریپور سے تعلق رکھنے والے 14 کمسن بچوں سمیت 20 افراد شدید زخمی ہو گئے۔ ریسکیو 1122 کے مطابق حادثے کا شکار ہونے والے تمام بچوں کی عمریں 12 سال سے کم ہیں، جبکہ زخمیوں میں 6 مرد بھی شامل ہیں۔ واقعے کی اطلاع ملتے ہی ریسکیو 1122 ایبٹ آباد کی تین ایمبولینسیں تربیت یافتہ عملے کے ساتھ فوری طور پر جائے وقوعہ پر پہنچیں۔

ریسکیو ٹیموں نے تمام زخمیوں کو موقع پر ابتدائی طبی امداد فراہم کرنے کے بعد قریبی اسپتال منتقل کیا۔ تاہم، طبی معائنے کے دوران بچوں کی حالت تشویشناک پائے جانے پر انہیں فوری طور پر ایوب میڈیکل کمپلیکس (AMC) منتقل کر دیا گیا۔ ریسکیو حکام کا کہنا ہے کہ زخمی بچوں کو فوری طور پر آپریشن تھیٹر شفٹ کیا گیا ہے جہاں ڈاکٹرز اور طبی عملہ ان کی جانیں بچانے کے لیے بھرپور کوششیں کر رہا ہے۔ ابتدائی اطلاعات کے مطابق حادثہ ڈرائیور کی تیز رفتاری کی وجہ سے پیش آیا، جبکہ قانون نافذ کرنے والے ادارے واقعے کی مزید تحقیقات کر رہے ہیں۔