نسلہ ٹاور کیس کے فیصلے کے بعد چیئرمین آباد کا بڑا مطالبہ

ایسوسی ایشن آف بلڈرز اینڈ ڈیولپرز (آباد) کے سابق چیئرمین حسن بخشی نے نسلہ ٹاور کیس میں سپریم کورٹ کے حالیہ فیصلے کا خیر مقدم کرتے ہوئے مطالبہ کیا ہے کہ متاثرہ خاندانوں کو بلا تاخیر مکمل معاوضہ ادا کیا جائے، کیونکہ گزشتہ 8 برسوں کے دوران انہیں شدید مالی اور ذہنی مشکلات کا سامنا کرنا پڑا ہے۔

حسن بخشی کا کہنا تھا کہ اگرچہ سپریم کورٹ کے فیصلے پر نظرثانی خوش آئند ہے، تاہم انصاف میں 8 سال کی طویل تاخیر نے متاثرہ خاندانوں کو ناقابلِ تلافی نقصان پہنچایا، یہاں تک کہ بعض متاثرین معاوضے کے انتظار میں ہی انتقال کر گئے۔ انہوں نے سابق چیف جسٹس گلزار احمد کے دور میں کیس کی سماعت کے طریقہ کار پر تنقید کرتے ہوئے کہا کہ مقدمے میں معمول کے عدالتی مراحل پر عمل نہیں کیا گیا اور اسے نچلی عدالتوں کے بجائے براہِ راست ازخود نوٹس کے تحت سپریم کورٹ میں سن کر فوری عملدرآمد کرا دیا گیا، جس سے نظرثانی کا حق متاثر ہوا۔ انہوں نے مزید کہا کہ کراچی کی آبادی اب 3 کروڑ کے قریب پہنچ چکی ہے، اس لیے موجودہ شہری ضروریات کو مدنظر رکھ کر فیصلے کیے جائیں۔ حسن بخشی نے تجویز دی کہ نسلہ ٹاور کی اراضی فروخت کر کے حاصل ہونے والی رقم متاثرہ مالکان کو دی جائے اور وفاقی و سندھ حکومتیں بھی اس عمل میں مالی تعاون کریں۔