برطانیہ اور فرانس نے گرین لینڈ پر امریکی قبضے کی دھمکی کو مسترد کر دیا

برطانیہ اور فرانس نے گرین لینڈ پر امریکی قبضے کی دھمکی کو واضح طور پر مسترد کر دیا ہے۔

برطانوی وزیراعظم سر کیئر اسٹارمر نے کہا کہ گرین لینڈ کے مستقبل کا فیصلہ وہاں کے عوام اور ڈنمارک کے حکمرانوں کا حق ہے، اور برطانیہ اس معاملے میں ڈنمارک کی وزیراعظم کے ساتھ کھڑا ہے۔

ادھر فرانس نے بھی گرین لینڈ کے ساتھ یکجہتی کا اظہار کیا۔ فرانسیسی وزارت خارجہ کے ترجمان کا کہنا تھا کہ سرحدیں طاقت کے ذریعے تبدیل نہیں کی جا سکتیں، اور گرین لینڈ، گرین لینڈ کے عوام اور ڈنمارک کے عوام کا ملک ہے، جس کے فیصلے انہی پر منحصر ہیں۔

ترجمان نے مزید کہا کہ وینزویلا کے معاملے میں بھی عالمی قوانین کا احترام نہیں کیا گیا، اور سلامتی کونسل کے مستقل اراکین، جیسے فرانس، کی یہ ذمہ داری ہے کہ وہ اقوام متحدہ کے چارٹر کی خلاف ورزی کی مذمت کریں۔

یاد رہے کہ امریکی صدر ڈونلڈ ٹرمپ نے کہا تھا کہ امریکا کو قومی سلامتی کے نقطہ نظر سے گرین لینڈ کی ضرورت ہے، جس پر بین الاقوامی سطح پر سخت ردعمل سامنے آیا ہے۔