امریکا : شیئرز میں ہیرا پھیری اور اندرونی معلومات پر ٹریڈنگ؛ پاکستانی نژاد 4 افراد سمیت 6 ملزمان پر فردِ جرم

امریکا میں کینسر اور اوپیئڈ ادویات بنانے والی کمپنیوں کے شیئرز میں ہیرا پھیری اور اندرونی معلومات پر ٹریڈنگ کے ایک بڑے کیس میں پاکستانی نژاد چار افراد سمیت چھ ملزمان پر فردِ جرم عائد کر دی گئی ہے۔
امریکی حکام کے مطابق یہ کیس 41 ملین ڈالر کے مالی فائدے سے جڑا ہے اور اس کی سماعت نیو جرسی کی وفاقی عدالت میں ہو رہی ہے۔ ملزمان میں تین افراد امریکا جبکہ ایک برطانیہ میں مقیم پاکستانی نژاد شہری شامل ہیں۔
الزام ہے کہ ملزمان نے 2020 سے 2024 کے دوران غیر اعلانیہ اور خفیہ معلومات کا استعمال کرتے ہوئے شیئر مارکیٹ میں سرمایہ کاری کی، جعلی کلینیکل ڈیٹا اور فرضی پریس ریلیز کے ذریعے شیئرز کی قیمتیں مصنوعی طور پر بڑھائیں اور بھاری منافع کمایا۔
چارج شیٹ کے مطابق مرکزی ملزم سعد شوکت نے ایک سرمایہ کاری بینک سے حاصل کردہ حساس معلومات دیگر ملزمان کو فراہم کیں، جس کے ذریعے کینسر کی دوا اور اوپیئڈ اوورڈوز کے علاج سے متعلق کمپنیوں کے شیئرز میں ہیرا پھیری کی گئی۔
امریکی استغاثہ کا کہنا ہے کہ ملزمان کے خلاف سیکیورٹیز فراڈ، اندرونی معلومات پر ٹریڈنگ، وائر فراڈ اور مارکیٹ میں ہیرا پھیری کے الزامات ہیں، اور جرم ثابت ہونے پر بعض الزامات میں 25 سال تک قید کی سزا ہو سکتی ہے۔
ایف بی آئی کے مطابق کیس کی تحقیقات جاری ہیں اور سرمایہ کاروں کو گمراہ کرنے کے ایسے جرائم کے خلاف سخت کارروائی کی جائے گی۔