پاکستان نے بنگلادیشی بیمان ایئرلائن کو براہِ راست پروازوں کی اجازت دے دی

نئے سال کے پہلے دن پاکستان اور بنگلادیش کے درمیان براہِ راست فضائی رابطے بحال ہو گئے ہیں۔ پاکستان نے بنگلادیش کی بیمان ایئرلائن کو ڈھاکا سے کراچی کے لیے براہِ راست پروازوں کی اجازت دے دی۔

سول ایوی ایشن اتھارٹی (CAA) نے حکومت کی منظوری کے فوری بعد بیمان ایئرلائن کو کراچی کے لیے براہِ راست پروازوں کا این او سی جاری کیا۔ ابتدائی طور پر یہ اجازت تین ماہ کے لیے ہے، یعنی 30 مارچ 2026 تک۔

اعلامیے کے مطابق بیمان بنگلادیش ایئرلائن پاکستان ایئراسپیس کے طے شدہ روٹس پر عمل کرے گی۔ براہِ راست پروازوں کی منظوری کے بعد کراچی ائرپورٹ پر فلائٹ سلاٹ کی منظوری بھی دے دی گئی ہے۔ ڈھاکا سے روانگی سے قبل فلائٹ کی مکمل معلومات کراچی ایئرپورٹ انتظامیہ کو فراہم کرنا لازمی ہوگی۔

سول ایوی ایشن اتھارٹی کا کہنا ہے کہ اس پیش رفت سے پاکستان اور بنگلادیش کے ایوی ایشن شعبے کو فروغ ملے گا، اور عوام و حکومتی رابطوں میں براہِ راست فضائی رابطے سے دونوں ملکوں کو فائدہ ہوگا۔