وزیراعلیٰ مریم نواز شریف نے واہگہ بارڈر لاہور پر تعمیر ایرینا کا افتتاح کر دیا

وزیراعلیٰ پنجاب مریم نواز شریف نے واہگہ بارڈر لاہور پر نئے تعمیر ہونے والے ایرینا کا افتتاح کر دیا۔ افتتاحی تقریب میں وزیراعلیٰ نے بطور مہمانِ خصوصی شرکت کی، جبکہ سینئر صوبائی وزیر مریم اورنگزیب، کور کمانڈر لاہور، صوبائی وزراء اور اعلیٰ سول و عسکری حکام بھی موجود تھے۔

پاکستان رینجرز (پنجاب) کے زیرِ اہتمام جوائنٹ چیک پوسٹ واہگہ پر منعقدہ خصوصی تقریب کے دوران نئے ایرینا کا باضابطہ افتتاح کیا گیا۔ توسیعی منصوبے کے تحت ایرینا میں شائقین کی نشستوں کی تعداد ساڑھے 7 ہزار سے بڑھا کر 25 ہزار کر دی گئی ہے، جس سے یومیہ تقریبات دیکھنے کے لیے آنے والے عوام کو مزید سہولت میسر آئے گی۔

ایرینا کی توسیع کے ساتھ ساتھ جوائنٹ چیک پوسٹ واہگہ پر متعدد نئی تعمیرات بھی مکمل کی گئی ہیں۔ ان میں تقسیمِ ہند کی عکاسی کرنے والا تھیم پارک شامل ہے جس میں ریلوے اسٹیشن کے ماڈلز، سامانِ حرب اور یادگارِ شہداء کو نمایاں کیا گیا ہے۔

مزید برآں، ایرینا میں تحریکِ آزادی سے لے کر آج تک پاکستان کی تاریخ اور ثقافت کو اجاگر کرنے کے لیے پاکستان میوزیم بھی تعمیر کیا گیا ہے۔ اس کے علاوہ اضافی دفاتر، پنجاب رینجرز کے جوانوں کے لیے بیرکس، نمازیوں کے لیے پریئر ایریا اور عوامی سہولت کے لیے فوڈ کورٹس بھی قائم کیے گئے ہیں۔

منصوبے کے تحت وسیع و عریض کار پارکنگ کی سہولت فراہم کی گئی ہے جبکہ بابِ آزادی کے مقام پر شاہی قلعہ کی طرز پر عالمگیری دروازہ بھی نصب کیا گیا ہے۔

واہگہ بارڈر پر نصب قومی پرچم کی بلندی بھی بڑھا دی گئی ہے، جو پہلے 115 میٹر تھی اور اب 139 میٹر کی بلندی پر لہرا رہا ہے۔ یہ پرچم ایشیا کا ساتواں جبکہ جنوبی ایشیا کا بلند ترین قومی پرچم قرار دیا جا رہا ہے۔

افتتاحی تقریب سے خطاب میں وزیراعلیٰ مریم نواز شریف نے کہا کہ واہگہ بارڈر نہ صرف پاکستان کی شناخت ہے بلکہ یہ قومی وقار، تاریخ اور ثقافت کی علامت بھی ہے، اور نئی تعمیرات عوام کے لیے ایک یادگار تجربہ ثابت ہوں گی۔