صدر ٹرمپ کا شکاگو، لاس اینجلس اور پورٹ لینڈ سے نیشنل گارڈز واپس بلانے کا فیصلہ

امریکی صدر ڈونلڈ ٹرمپ نے شکاگو، لاس اینجلس اور پورٹ لینڈ سے نیشنل گارڈز کو واپس بلانے کا فیصلہ کر لیا ہے۔
وائٹ ہاؤس سے جاری بیان میں صدر ٹرمپ کا کہنا تھا کہ نیشنل گارڈز کی تعیناتی کے بعد ان شہروں میں جرائم کی شرح میں نمایاں کمی دیکھی گئی، جس کے باعث اب فورسز کی واپسی کا فیصلہ کیا گیا ہے۔

ڈونلڈ ٹرمپ نے خبردار کیا کہ اگر ان شہروں میں دوبارہ جرائم میں اضافہ ہوا تو وفاقی فورسز ایک بار پھر تعینات کی جائیں گی، اور اس بار ان کی واپسی پہلے سے زیادہ سخت اور مضبوط انداز میں ہو سکتی ہے۔

دوسری جانب کیلیفورنیا کے گورنر نے وفاقی فورسز کی تعیناتی پر اعتراض کرتے ہوئے کہا ہے کہ ریاست میں نیشنل گارڈز کی موجودگی کی ضرورت نہیں تھی اور صدر ٹرمپ نے اپنے اختیارات سے تجاوز کیا۔

واضح رہے کہ صدر ٹرمپ نے گزشتہ سال جون میں شکاگو، لاس اینجلس اور پورٹ لینڈ میں نیشنل گارڈز کی تعیناتی کا اعلان کیا تھا، تاہم یہ اقدام متعدد قانونی چیلنجز اور سیاسی تنازعات کا شکار رہا۔