قومی سلامتی پر کوئی سمجھوتہ نہیں، سعودی کابینہ کا دوٹوک مؤقف

سعودی عرب کی کابینہ نے واضح الفاظ میں اعلان کیا ہے کہ مملکت کی قومی سلامتی کے تحفظ کے لیے کسی بھی ممکنہ اقدام سے گریز نہیں کیا جائے گا۔

عرب میڈیا کے مطابق سعودی فرمانروا شاہ سلمان بن عبدالعزیز کی زیرِ صدارت سعودی کابینہ کا اجلاس منعقد ہوا، جس میں خطے کی سیکیورٹی صورتحال پر تفصیلی غور کیا گیا۔ اجلاس کے دوران شرکاء نے کہا کہ یمن میں بلاجواز کشیدگی متحدہ عرب امارات کے سابقہ وعدوں اور بیانات سے مطابقت نہیں رکھتی۔

سعودی کابینہ نے امید ظاہر کی کہ متحدہ عرب امارات یمنی گروہوں کو کسی بھی قسم کی فوجی یا مالی معاونت فراہم نہیں کرے گا اور اس معاملے میں دانشمندی اور برادرانہ اصولوں کو ترجیح دی جائے گی۔

اجلاس میں ایک اور اہم معاملے پر ردعمل دیتے ہوئے سعودی کابینہ نے اسرائیل کی جانب سے صومالی لینڈ کو تسلیم کرنے کے اعلان کو بھی مسترد کر دیا اور اس اقدام کو خطے کے استحکام کے خلاف قرار دیا۔