بریڈفورڈ احتجاج پر پاکستان کا سخت ردعمل، برطانوی ڈپٹی ہیڈ آف مشن کو وزارت خارجہ طلب کر کے ڈیمارش

اسلام آباد: بریڈفورڈ میں پاکستانی قونصل خانے کے باہر ہونے والے احتجاج پر پاکستان نے سخت سفارتی ردعمل دیتے ہوئے برطانیہ کے ڈپٹی ہیڈ آف مشن میٹ کینل کو وزارت خارجہ طلب کر کے باضابطہ احتجاج ریکارڈ کرایا ہے۔

ذرائع کے مطابق برطانوی ہائی کمشنر جین میریٹ اس وقت پاکستان میں موجود نہیں تھیں، جس کے باعث وزارت خارجہ نے برطانیہ کے قائم مقام ہائی کمشنر کو طلب کر کے ڈیمارش جاری کیا۔ ڈیمارش میں برطانوی شہر بریڈفورڈ میں پاکستانی قونصل خانے کے باہر ہونے والے احتجاج پر شدید تحفظات سے آگاہ کیا گیا۔

ذرائع کا کہنا ہے کہ ایک سیاسی جماعت کے آفیشل سوشل میڈیا اکاؤنٹ کو برطانیہ میں مظاہرین کو جمع کرنے کے لیے استعمال کیا گیا۔ مظاہرین نے چیف آف ڈیفنس فورسز کے خلاف انتہائی اشتعال انگیز، توہین آمیز اور قابلِ اعتراض زبان استعمال کی۔ احتجاج کے دوران فیلڈ مارشل کو جان سے مارنے کی کھلی دھمکیاں دی گئیں اور انہیں کار بم دھماکے میں قتل کرنے کے نعرے لگائے گئے۔

حکومتِ پاکستان نے برطانیہ کی سرزمین سے دی جانے والی ان سنگین دھمکیوں کا سخت نوٹس لیتے ہوئے اس بات پر زور دیا ہے کہ برطانیہ اپنی سرزمین کو پاکستان کو غیر مستحکم کرنے کے لیے استعمال نہ ہونے دے۔

پاکستان نے امید ظاہر کی ہے کہ برطانوی حکومت ایسے شرپسند عناصر کے خلاف فوری اور سخت قانونی کارروائی کرے گی اور انہیں قانون کے مطابق جوابدہ ٹھہرایا جائے گا۔

ترجمان دفتر خارجہ طاہر حسین نے بھی برطانوی قائم مقام ہیڈ آف مشن کو ڈیمارش جاری کیے جانے کی تصدیق کر دی ہے۔