شرجیل میمن کی زیر صدارت سندھ میں ٹرانسپورٹ منصوبوں کا اہم اجلاس

سندھ کے سینئر وزیر شرجیل انعام میمن کی صدارت میں محکمہ ٹرانسپورٹ کا اجلاس منعقد ہوا جس میں صوبے میں جاری اور آئندہ ٹرانسپورٹ منصوبوں کا تفصیلی جائزہ لیا گیا۔ اجلاس میں یلو لائن اور ریڈ لائن بی آر ٹی منصوبوں پر جاری ترقیاتی کام، تعمیراتی مراحل، چیلنجز اور آئندہ اہداف پر بریفنگ دی گئی۔

شرجیل میمن نے کہا کہ جہاں ممکن ہو منصوبوں پر متوازی کام کیا جائے تاکہ غیر ضروری تاخیر نہ ہو، اور تمام منصوبے مقررہ مدت میں مکمل کر کے عوام کو جلد فائدہ پہنچایا جائے۔ انہوں نے ڈبل ڈیکر بسوں، ای وی بسوں کے نئے روٹس اور پنک اسکوٹیز کے دوسرے مرحلے پر بھی روشنی ڈالی اور کہا کہ یہ اقدامات شہریوں کو جدید، سستی اور ماحول دوست سفری سہولیات فراہم کریں گے اور خواتین کو بااختیار بنانے میں مددگار ثابت ہوں گے۔