امریکا میں پاکستانی سفارت خانے میں کرسمس کے حوالے سے خصوصی تقریب

کرسمس کے پرمسرت موقع پر منعقدہ تقریب کے دوران کیک کاٹا گیا اور مسیحی برادری سے تعلق رکھنے والے سفارتی عملے کو تحائف پیش کیے گئے۔

اس موقع پر سفیرِ پاکستان رضوان سعید شیخ نے خصوصی پیغام میں امریکا، پاکستان اور دنیا بھر کی مسیحی برادری کو کرسمس اور نئے سال کی مبارکباد دی۔ انہوں نے کہا کہ کرسمس صرف عیسائیوں ہی نہیں بلکہ پوری دنیا کے لوگوں کے لیے خوشی کا موقع ہے۔

سفیرِ پاکستان کا کہنا تھا کہ پاکستان ایک کثیر الثقافتی، کثیر لسانی اور کثیر النسلی معاشرہ ہے جہاں مختلف سماجی، ثقافتی اور مذہبی روایات صدیوں میں پروان چڑھی ہیں۔ انہوں نے زور دیا کہ اختلافات کے بجائے مشترکات پر مبنی سوچ ہم آہنگی اور بین المذاہب بقائے باہمی کو فروغ دیتی ہے۔

رضوان سعید شیخ نے کہا کہ اسلام حضرت عیسیٰ علیہ السلام کو خدا کے برگزیدہ رسولوں میں شمار کرتا ہے اور ان کا احترام مسلمانوں کے ایمان کا حصہ ہے۔ انہوں نے اقوامِ متحدہ کی قراردادوں کا حوالہ دیتے ہوئے بین المذاہب ہم آہنگی اور نفرت کی حوصلہ شکنی پر زور دیا۔

آخر میں انہوں نے دعا کی کہ نیا سال 2026 پوری دنیا کے لیے امن، ترقی اور خوشحالی لے کر آئے اور کرسمس کا جذبہ آنے والے تمام برسوں تک برقرار رہے۔