قومی ٹیم انڈر 19 ورلڈ کپ میں شرکت کیلئے زمبابوے روانہ

ایشین چیمپئن پاکستان انڈر 19 کرکٹ ٹیم تین ملکی سیریز اور آئی سی سی انڈر 19 ورلڈ کپ میں شرکت کے لیے زمبابوے روانہ ہو گئی ہے۔ ٹیم کی قیادت فرحان یوسف کر رہے ہیں۔

روانگی سے قبل چیئرمین پاکستان کرکٹ بورڈ محسن نقوی نے ہوٹل میں ٹیم سے ملاقات کی اور کھلاڑیوں اور آفیشلز کو نیک تمناؤں کے ساتھ الوداع کیا۔ پاکستان انڈر 19 ٹیم اسلام آباد سے براستہ دبئی زمبابوے کے دارالحکومت ہرارے روانہ ہوئی، جس میں سکواڈ کے تمام 15 کھلاڑیوں کے ساتھ ٹیم مینجمنٹ بھی شامل ہے۔

پاکستان انڈر 19 ٹیم زمبابوے میں ہونے والی تین ملکی سیریز کے ساتھ ساتھ آئی سی سی انڈر 19 ورلڈ کپ میں بھی حصہ لے گی۔ تین ملکی سیریز کا آغاز 25 دسمبر سے ہوگا، جبکہ پاکستان انڈر 19 ٹیم اپنا پہلا میچ 27 دسمبر کو کھیلے گی۔پی سی بی حکام کے مطابق روانگی کے وقت کھلاڑی پُرعزم اور پُراعتماد نظر آئے، جبکہ ٹیم انتظامیہ نے دورے کے دوران شاندار کارکردگی کی امید ظاہر کی ہے۔